म्युजिक भिडियोमा पारिश्रमिक कम गर्न तयार छैनन् कलाकार

नागरिक मिडिया

२०७७ अषाढ १२, शुक्रबार मा प्रकाशित ३ साल अघि

काठमाण्डाैं-  नेपालमा लकडाउन अगाडि म्युजिक भिडियोको निर्माणमा बाढी नै आएको थियो । म्युजिक भिडियोमा चलेका मोडलहरूले पारिश्रमिक पनि लोभलाग्दो लिन्थे । चलेका मोडलहरुले ५० हजारदेखि एक लाखसम्म पारिश्रमिक सहजै लिइरहेका थिए ।

लकडाउनका कारण म्युजिक भिडियोको निर्माण पनि रोकियो । तर लकडाउन खुकुलो हुँदै गएपछि बिस्तारै सामाजिक दुरी कायम गरेर म्युजिक भिडियोको निर्माण हुन थालेको छ ।

तर लकडाउनका कारण अधिकांश क्षेत्र अस्तव्यस्त भइरहेको समयमा म्युजिक क्षेत्रलाई पनि पुरानै अवस्थामा फर्किन समय लाग्नेछ। यस्तो अवस्थामा के कलाकारहरू पारिश्रमिक घटाएर काम गर्न तयार छन् त ?

प्राप्त जानकारीअनुसार नेपाली म्युजिक भिडियोमा चलेका कलाकारहरू अहिले पारिश्रमिक घटाएर काम गर्न तयार छैनन् । लकडाउनका कारण आफूहरूलाई पनि प्रभाव परेको भन्दै कलाकारले पुरानै रकममा काम गरिरहेका छन् ।

कतिपय कलाकार भने काम गर्न तयार भए पनि पारिश्रमिक कटौतीको कुरा गर्न तयार छैनन् ।

चलचित्रको निर्माण सुरु नभएकाले पनि अहिले नै कलाकारको पारिश्रमिकमा फेरबदल आउँछ या आउँदैन भन्न सकिने अवस्था छैन । तर म्युजिक भिडियोमा भने चलेका कलाकारहरूसँग पुरानै पारिश्रमिकमा निर्माताले काम गर्नुपर्ने देखिएको छ। कतिपय कलाकारले भने अवस्था बुझेर २५ प्रतिशत कम पारिश्रमिकमा काम गरिरहेका छन् । @Onlinekhabar.com