ठेकेदारको तस्बीरमा गोबर सहितकाे ब्यानर बाेकेर आन्दोलनमा स्थानीय

नागरिक मिडिया

२०८० बैशाख ३१, आईतबार मा प्रकाशित ११ महिना अघि

ओखलढुंगा– ओखलढुंगा सदरमुकामदेखि निशंखे सडक ग्राभेलको काम वर्षौंदेखि अलपत्र पारेको भन्दै स्थानीयबासी आन्दोनलमा उत्रिएका छन् । आन्दोलनमा उत्रिएका स्थानीयले ठेकेदारको तस्बीरमा गोबर दलेर सांकेतिक विरोध गरेका छन् । आन्दोलनकारीले सोलुखुम्बु–ओखलढुंगा–हर्कपुर सडकखण्डमा पर्ने गोरुमारेभन्ज्याङमा सडक अवरुद्ध पारेका छन् ।

सडक अवरुद्ध हुँदा सयौं सवारी साधनका यात्रुहरु अलपत्र परेका छन् । कान्छाराम कन्सट्रक्सनले एकवर्षभित्र सम्पन्न गर्ने सम्झौता सहित २०७६ पुष ९ गते ठेक्का लिएको थियो । पटक पटक म्याद थप गरेपनि हालसम्म काम सम्पन्न नगर्दा सडकमा उड्ने धुलोले आसपासका स्थानीयको स्वास्थ्यमै असर पुगेको गुनासो छ ।

१२ किलोमिटर सडक ग्राभेलका लागि १६ करोड ६४ लाख ६५ हजार आठ सय ३८ रुपैंयामा ठेक्का लागेको थियो । आन्दोलनमा उत्रिएका स्थानीयले कान्छाराम कन्सट्रक्सनका प्रमूख कान्छाराम भनेर चिनिने पूर्णबहादुर तामाङको तस्बीरमा गोबर दलेर विरोध जनाएका छन् ।

ठेकेदार कान्छाराम रामेछापका कांग्रेस जिल्ला सभापति तथा संघीय प्रतिनिधिसभाका सांसद हुन् । उनको फर्म मार्फत स्थानीय ठेकेदार जितबहादुर श्रेष्टले काम गरेका थिए । काममा लगाइएका दर्जनौ कामदारले महिनौंदेखि मजदुरी समेत नपाएको गुनासो छ । सडक निर्माण तत्काल सुचारु गरि सम्पन्न नगरे आन्दोलन चर्काउने सडक संघर्ष समितिका अध्यक्ष सुवास गुरुङले बताए ।