२०८१ जेष्ठ ८, मंगलबार | Tue, 21, May, 2024

बाह्रबिसे सबस्टेसनको तत्काल निर्माण सक्न प्राधिकरणको ताकेता

  • २०८० मंसिर १, शुक्रबार मा प्रकाशित ६ महिना अघि
  • नेपाल विद्युत् प्राधिकरणको उच्च व्यवस्थापनले सिन्धुपाल्चोकको बाह्रबिसेमा निर्माणाधीन २२०/१३२ केभी सबस्टेसनको निर्माण तत्काल सम्पन्न गर्न ताकेता गरेको छ।

    चिलिमे जलविद्युत् कम्पनीको अगुवाइमा सिन्धुपाल्चोकमा अगाडि बढाइएको १०२ मेगावाटको मध्यभोटेकोशी जलविद्युत्‌बाट उत्पादित बिजुली खेर जान नदिन आयोजनाको विद्युत् जोडिने सबस्टेसन निर्माण सम्पन्न गर्न प्राधिकरणको उच्च व्यवस्थापनले ताकेता गरेको हो।

    नेपाल विद्युत् प्राधिकरणका कार्यकारी निर्देशक कुलमान घिसिङ र आयोजना व्यवस्थापन निर्देशनालयका उपकार्यकारी निर्देशक ताराप्रसाद प्रधान सम्मिलित प्राधिकरणको उच्चस्तरीय टोलीले बिहीबार सबस्टेसन निर्माणस्थलको अनुगमन भ्रमण गरी बाँकी काम तत्काल सम्पन्न गर्न निर्देशन दिएको छ।

    टोलीले आयोजना व्यवस्थापन र निर्माण व्यवसायीसँग कामकारबाहीमा देखिएका समस्या, उपकरण आपूर्तिको अवस्था, निर्माण सम्पन्न हुने तालिकालगायतका विषयमा छलफल गरेको थियो।

    सबस्टेसनको निर्माण आगामी माघको पहिलो हप्ताभित्र (१५ जनवरी २०२४) सम्पन्न गर्ने तालिका तय गरिएको छ।

    कार्यकारी निर्देशक घिसिङले निर्माण व्यवसायीले पछिल्लो समय आफ्नो कार्यसम्पादनमा सुधार गरी सबस्टेसन निर्माणमा राम्रो प्रगति हासिल गरेको बताए।

    घिसिङले सबस्टेसनमा राखिने सम्पूर्ण उपकरण आपूर्ति भइसकेको र केही जडान पनि भइसकेको अवस्थामा जनशक्ति थप गरी जडान कार्यलाई तीव्रता दिन निर्देशन दिए।

    नेपाल खबर डटकमबाट

    प्रतिक्रिया दिनुहोस