सहकारी र गिरीबन्धु दुवै काण्ड छानविन हुनुपर्छ: संग्रौला

तस्वीरः पत्रकार सम्मेलनमा बोल्दै नेता संग्रौला । शिवप्रसाद ढुंगाना

शिवप्रसाद ढुङ्गाना

२०८१ जेष्ठ ६, आईतबार मा प्रकाशित २ महिना अघि

ओखलढुंगा- नेपाली कांग्रेसका केन्द्रिय सदस्य डा. डिला संग्रौलाले सहकारीदेखि गिरीबन्धु लगायतका सबै काण्ड छानविन गर्न संसदीय समिति बन्नु पर्ने बताएकी छिन् । ओखलढुंगामा पत्रकारहरुसँग कुरा गर्दै उनले गृहमन्त्री जोडिएको सहकारीदेखि एमाले अध्यक्ष केपी ओली जोडिएको गिरीबन्धु टि स्टेट समेतको छानविन हुनुपर्ने कांग्रेसको बटमलाइन रहेको बताइन् ।

जागरण अभियानमा पूर्वी पहाड भ्रमणमा निस्केकी नेता संग्रौलाले क्रियाशील सदस्यता वितरण कार्यक्रममा पनि सहभागिता जनाइन् । उनले सुशासन कायम गर्न पनि रवि लामिछाने र केपी ओलीमाथि छानविन हुनु पर्नेमा जोड दिइन् । ‘आज अदालतबाट फैसला आइसकेको छ, यो नीतिगत भ्रष्टाचार हो, तत्कालीन ओली सरकारले कानुन नै परिवर्तन गरेको थियो’ उनले भनिन् ।

यस्तो नीतिगत भ्रष्टाचार पनि छानविन हुनुपर्छ भनेर कांग्रेसले सदनमा मुद्दा राखिरहेको उनको प्रष्टीकरण छ । संसद चलाउन शुभकामना दिँदै उनले सदन प्रतिपक्षको भएकाले सोही अनुसार अघि बढ्नु पर्ने पनि जनाइन् ।

नीति कार्यक्रम कर्मकाण्डी

सरकारको नीति तथा कार्यक्रममाथि पनि उनले टिप्पणी गरिन् । सरकारको नीति तथा कार्यक्रमले कृषकलाई नछोएको उनले बताइन् । किसानका उत्पादनले मूल्य नपाए पनि भारतबाट आयतित विष खानु पर्ने बाध्यता रहेको भन्दै आक्रोश पोखिन् ।

जनताको आवश्यकतामा नछुने र कार्यकर्ता पोस्ने गरि आएको कार्यक्रमले जनजीविकाका सवाल नछुने उनको तर्क छ । उनले प्रधानमन्त्री छोरी आत्म निर्भर कार्यक्रम आफ्नै कार्यकर्ता पोस्न ल्याएको उनको आरोप छ ।